Kawlgam Kumpipa U Thein Sein Thukhen zumah ki khia

2012 November 29 ni aa Letpandan mual Project khawlna ding lungphona nei mipite meikuang bomb zangh aa mipite akhen khiatna tawh kisai in Kawlgam kumpipa in mawh puakna nei hi. Ahih hangin tuni ciang dong kumpi pa'n bangmah ciantak aa sepna leh hihna  neilo ahih manin lungkim zolo uh-in 2013 March 4 ni in Ma Win Htee (Setee khua), Ma YiYi Win (Setee Khua), leh Ko Zaw Naing (Moekyopin Khua) te in makai in Khua nu khaupa te tawh Salinkyi Myone thukhen zumah Kawlgam kumpipa U Thein Sein pen khia in thubawl uhhi. Thubawlte (Tayalu) te lampan in Sitni (Lawyer) U Saw Kyaw Min in ngaihsut dan (acian) piakna nei hi. Salinkyi Myone thukhenpi nu Daw Khin Khin Swe  in hih thu pen saang ding maw, saanglo ding cih bangmah gen nuam lo hi. A pian dang thu khat hong suak ahih manin hih thu pen san ding sanloh ding pen March Kha 11 ni in hong pai kik un ci in vai khak kik hi. Hih thupiang tawh kisai in thuneite in nawngkai sakna bangmah abawl loh uh hangin man (photo) zaihna leh aki hel khuamite minte kaan hiauhiau hi cih thu ki za hi.