Daw Aung San Suu Kyi Kumpi Dingin Ka Thukimpih Ding Hi ci-in Kumpipa Thein Sein In Gen Hi.

Daw Aungsan Suu Kyi Kumpi dingin Ka Thukimpih Ding Hi Ci-in Kawlgam kumpi 

Thein Sein in Gen hi.

Daw Aung San Suu Kyi kumpi dingin ka thukimpih dinghi ci'n Kawlgam kumpi U Thein Sein in BBC te ii Hardtalk program te tawh kimuh na pan gen khia hi ci'n September 29 ni-in BBC in gen hi.

2015 kiteel ciang kuamah peuhin amau teelnop peuh tel thei dingaa, mipi deihna zahtakin  thupi san ding ahihi ci in U Thein Sein in gen hi.

Kumpipa U Thein Sein in Amah (Suu Kyi) in gam makaipi suak ding suak lo ding cih pen mipi tungah om hi. A zenzenin mipi in amah a thukim nak leh kei zong ka thukimpih ding hi ci in gen hi."Kei leh Daw AungSan Suu Kyi kikal ah ki nawngkaaina bangmah omlo hi" ci'n gen hi.

Tua  banah Hlut-daw ah panmun 25% a ngahsa galkapte in kawlgam ki ukna ah a thupi mahmah panmun pan in kihel to lai ding hi ci in kumpi Thein Sein in genbeh lai hi.

Kumpi pa Thein Sein in Setember 27 ni-in American gam New York khuapi UNO zumpi aa kibawl a 67 veina UNO khawmpi ah thugenna nei in, "nidang in opposition party makaipi Daw Aung San Suu Kyi mahmah zong Hlut-daw  tang'mi min tawh bek tham loin thu man aom thei na ding Hlut-daw committee chairman min tawh zong Hlut-daw sungah kihel in nasem ta ahihi. Tu nipi sung zong Daw Suu in New York khuapi ah om hi. Democracy ngah na'ng a hanciamna hang aa USA gam pan nong pahtawi sak uh zong kawlgam mi khat ka hihna tawh ka kipak mahmah hi" ci in lungdam koh pahtawina kammal zong gen hi.

Tu laitak aa kizangh 2008 kum aa kawlgam bup ki uk dan ding thukhun te tungtawn in Kawlgam Democracy makaipi Daw Aung San Suu Kyi in kumpi panmun lak theina nei lo hi.

 2008 kum kawlgam thukhunpi sungah "gam kumpi dingte in.....

• Amahmah ahi zongin,
• Amah ii nulehpa khat pepeuh ahi zongin,
• Amah ii zi ahih keileh a pasal ahi zongin,
• Amah ii ata taktak te khat pepeuh ahi zongin,
• Tua ata taktak ii zi ahih keileh a pasal ahi zongin,
• Gamdang kumpi khat peuh thupaikte azui 
• Ahih keileh gamdang kumpi khat ii khut nuai ah ahih keileh
• Gamdang khat peuh ii gammi hi lo ding hi.
• Tuate in gamdang kumpi khat ii khut nuaiah mi asuak khat peuh ahi zongin,
• Gamdang khat ii gammite ngah ding hamphatna a ngah te hilo dinghi."

          ci-in kumpi dingte ii hihna ding tawh kisai in ki geel khol sa ahihi.

         

Daw Aung San Suu Kyi ii tate nih in tu laitakin Kawlgam mi hi lo ahih manin Daw Aung San Suu Kyi kumpi a suah thei na'ng in a tungaa geel kholhna thukhunte  Hlut-daw in a puahphat kul ding hi.

A tungaa thu geel kholhna te aki khen nop leh Pyiduangsu hlut-daw tang'mi khempeuh ii (ျပည္ေထာင္စုလႊတ္ေတာ္ ကိုယ္စားလွယ္အားလုံး၏) 75% val in puahphat dingin thukim khit ciang gambup ah thukim na kila dingaa me pia thei khempeuh ii a lang tamzaw in me piakna tawh 2008 kum aa ki ukna ding thukhun te khel thei pan  ding hi ci in om hi.

Tua ahih manin ki ukna thukhun te khel nading in Hlut-daw ah 25% ngahsa ahi galkap Hlut-daw Ku-sa-hle te zong a thupi mahmah panmun khat ah om hi.

(https://www.facebook.com/ElevenMediaGroup/posts/435190169851945)

Lianpi (Ngaitui Von)